SJ WorldNews - шаблон joomla Авто

တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင် ဦးဆောင်သည့် မြန်မာ့တပ်မတော်ချစ်ကြည်ရေး ကိုယ်စား လှယ်အဖွဲ့ ဗုဒ္ဓမြတ်စွာဘုရားဖွားမြင်တော် မူရာ လုမ္ဗိနီဥယျာဉ်သို့သွားရောက်ကြည့်ရှုလေ့လာ

Tuesday, 12 December 2017 22:28 font size decrease font size decrease font size increase font size increase font size

နေပြည်တော်၊ ဒီဇင်ဘာ -၁၂

 

နီပေါတပ်မတော်ကြည်းတပ်ဦးစီးချုပ် Gen. Ranjendra Chhetri ၏ ဖိတ်ကြားချက်အရ နီပေါဖက်ဒရယ်ဒီမိုကရက်တစ် သမ္မတနိုင်ငံသို့ချစ်ကြည်ရေးခရီး ရောက်ရှိနေသည့် တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်သည်ဇနီး ဒေါ်ကြူကြူလှ၊ကာကွယ်ရေးဦးစီးချုပ်ရုံးမှ တပ်မတော်အရာရှိကြီးများ၊ နီပေါ နိုင်ငံဆိုင်ရာမြန်မာနိုင်ငံသံအမတ်ကြီး ဦးထွန်းနေလင်းနှင့်ဇနီး၊ အိန္ဒိယနိုင်ငံဆိုင်ရာ မြန်မာစစ်သံ(ကြည်း၊ရေ၊လေ) ဗိုလ်မှူးချုပ် သိန်းဇော်နှင့်ဇနီးနှင့်တာဝန်ရှိသူများ လိုက်ပါပြီး ယနေ့နံနက်ပိုင်းတွင် လုမ္ဗိနီမြို့ရှိ ဗုဒ္ဓမြတ်စွာဘုရားဖွားမြင်တော်မူရာ လုမ္ဗိနီဥယျာဉ်သို့ သွားရောက်ကြည့်ရှု လေ့လာသည်။

 

ဦးစွာတပ်မတော်ကာကွယ်ရေးဦးစီးချုပ်နှင့်ဇနီးဦးဆောင်သည့် ချစ်ကြည်ရေး အဖွဲ့သည် ခတ္တမန္ဒူမြို့ရှိ Nepal Army Mid Air Base မှနီပေါတပ်မတော် အထူးရဟတ်ယာဉ်များဖြင့်ထွက်ခွာကြပြီး လုမ္ဗိနီမြို့သို့ရောက်ရှိရာ နီပေါတပ်မတော် အ နောက်အလယ်ပိုင်းတိုင်းမှူး Maj. Gen Rajeudra Karki နှင့်ဇနီးတို့ကကြိုဆိုနှုတ်ဆက် ကြသည်။

 

ယင်းနောက်တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် လုမ္ဗိနီဥယျာဉ် အတွင်းရှိ မြတ်စွာဘုရားဖွားမြင်တော်မူ သည့်နေရာအားဗဟိုပြုကာ တည်ဆောက်ထားသည့် မာယာဒေ၀ီကျောင်းတော်အတွင်း လှည့်လည် ကြည့်ရှုလေ့လာ၍ ၀တ်ပြုကန်တော့ကြပြီးရွှေသင်္ကန်းများဆက်ကပ်လှူဒါန်းသည်။ ထို့နောက် ဗုဒ္ဓမြတ်စွာ လောင်းလျာ သိဒ္ဓတ္ထမင်းသား မဖွားမြင်မီ မယ်တော်မာယာဒေ၀ီ ဆင်းသက်ရေချိုးသန့်စင်ခဲ့သည့် ရေကန်၊ လုမ္ဗိနီအသောကကျောက်စာတိုင်နှင့် လုမ္ဗိနီဥယျာဉ်အတွင်း လှည့်လည်ကြည့်ရှုလေ့လာပြီး ဧည့်သည်တော်မှတ်တမ်းစာအုပ်တွင် လက်မှတ်ရေးထိုးသည်။ ၎င်းနောက် လုမ္ဗိနီဥယျာဉ်မှတာဝန်ရှိသူတစ်ဦးက တပ်မတော် ကာကွယ်ရေးဦးစီးချုပ်အား ဓမ္မဒါနလက်ဆောင်အဖြစ် ဗုဒ္ဓရုပ်ပွားတော်မြတ် အားပေးအပ်ပြီး တပ်မတော်ကာကွယ်ရေးဦးစီးချုပ်က လုမ္ဗိနီဥယျာဉ်တော်ကြီးအား ထိန်းသိမ်းရန် အတွက်အလှူငွေများပေးအပ်လှူဒါန်းသည်။

 

ဆက်လက်ပြီးတပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် ပဏ္ဍိတာရာမ လုမ္ဗိနီအပြည်ပြည်ဆိုင်ရာ သာသနာ့ရိပ်သာသို့ရောက်ရှိကြပြီးရိပ်သာအတွင်းရှိ ယောဂီများတရားအားထုတ်သည့်နေရာ များအားလှည့် လည်ကြည့်ရှု လေ့လာကြရာ ကျောင်းထိုင် ဆရာတော် ဂျာမနီနိုင်ငံသားအရှင်ဝိကောနန္ဒာနှင့် ဆရာလေး ဒေါ်ဘဒ္ဒမဏိကာတို့က လိုက်လံရှင်းလင်းပြသသည်။

 

ယင်းနောက် တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် ဆရာတော်အရှင် ၀ိကောနန္ဒာထံမှ ငါးပါးသီလခံယူ ဆောက်တည်ကြပြီး တပ်မတော် ကာကွယ်ရေးဦးစီးချုပ်နှင့် ဇနီးတို့ကကျောင်းထိုင်ဆရာတော်နှင့် သီလရှင်ဆရာလေးတို့အား န၀ကမ္မ၀ထ္ထုငွေများနှင့်လှူဖွယ်ပစ္စည်းများဆက်ကပ်လှူဒါန်းသည်။ ထို့နောက် လှူဒါန်းမှု အစုစုအတွက်ရေစက်သွန်းချ အမျှပေးဝေးကြသည်။ အဆိုပါ ပဏ္ဍိတာရာမလုမ္ဗိနီ အပြည်ပြည်ဆိုင်ရာ သာသနာ့ရိပ်သာအား မြန်မာနိုင်ငံမှ မဟာစည် ဆရာတော်ကြီး၏ တပည့်ပဏ္ဍိတာရာမရွှေတောင်ကုန်းသာသနရိပ်သာ၏ သြ၀ါဒစရိယဆရာတော် အရှင်ပဏ္ဍိတာ ဘိဝံသ တည်ထောင်ဖွင့်လှစ်ထားခြင်းဖြစ်သည်။ ရိပ်သာအား တစ်နှစ်ပတ်လုံးဖွင့်လှစ် ထားပြီးကမ္မဋ္ဌာန်းတရား အားထုတ်နည်း ကိုသင်ကြား ပေးလျက်ရှိကာ ယခုအချိန်တွင် နိုင်ငံပေါင်း ၁၇ နိုင်ငံမှယောဂီ ၃၅ ဦး လာရောက်အားထုတ်လျက် ရှိကြောင်းသိရှိရသည်။

 

၎င်းနောက်တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် လောကမဏိစူဠာစေတီတော်အား ဖူးမြော်ကြည်ညိုပြီး လက်ယာရစ်လှည့်လည်ဖူးမြော်သည်။ယင်းနောက် မြန်မာရွှေကျောင်းသို့ရောက်ရှိကြပြီး ကျောင်းထိုင် ဆရာတော် အရှင်ဝိဇ္ဇာနန္ဒ အားဖူးမြော်ကြည်ညို၍ သာသနာရေးဆိုင်ရာများမေးမြန်းလျှောက်ထားပြီး န၀ကမ္မ၀ထ္ထုငွေနှင့် လှူဖွယ်ပစ္စည်းများ ဆက်ကပ်လှူဒါန်းသည်။ ထိုမှတစ်ဆင့် တပ်မတော် ကာကွယ်ရေးဦးစီးချုပ်နှင့် အဖွဲ့ဝင်များသည် kapilvastu ခရိုင်ရှိ ကပိလ၀တ်မြို့ဟောင်းသို့ ရောက်ရှိကြပြီး မြို့ဟောင်းအတွင်းလှည့်လည်ကြည့်ရှု လေ့လာကြရာတာဝန်ရှိသူများက လိုက်လံ ရှင်းလင်းပြသခဲ့ကြသည်။

 

ထို့နောက်တပ်မတော်ကာကွယ်ရေးဦးစီးချုပ်နှင့်အဖွဲ့ဝင်များသည် နီပေါနိုင်ငံ၏ ဒုတိယအကြီးဆုံးမြို့ဖြစ်သည့် Pokhara မြို့သို့ရောက်ရှိ၍ မြိုတွင်းတွင် လှည့်လည်ကြည့်ရှု လေ့လာကြသည်။ Pokhara မြို့သည်နီပေါနိုင်ငံတွင် သာယာလှပသော ပတ်ဝန်းကျင်ရှိပြီး ကမ္ဘာလှည့်ခရီးသွားများ အများဆုံးလာရောက်ကြသည့်မြို့တစ်မြို့ ဖြစ်ကြောင်းသိရှိရသည်။

Read 162 times Last modified on Tuesday, 12 December 2017 22:37